சற்று என்பது

0
49

சற்று என்பது சற்றாகவே இருந்தது

இரகசிய முத்தத்தின் நீளங்களில்

அதற்குப் பின்னான வெட்கங்களில்

பிறகுதான்

சற்று என்பது சற்று அல்ல

நம் பாலம் விரிசலுற்றபோது

சற்று என்பது சற்று அல்ல

நம் நிலம் மேனி சிலிர்த்தபோது

சற்று என்பது சற்றே அல்ல

நம் கலத்தில் துளை விழுந்தபோது

சற்றேறக் குறைய சற்று என்பது

அதற்கு முந்தைய பாரங்களை ஏற்று

அச்சு முறித்த கடைசிச் சொல்

அல்லது

அதில் காத்திருக்க வேண்டிய கண்ணியம்

அல்லது

உன் குழந்தையின் சாயலில் தெரியும் நீ