இந்த ஆற்றின் குரல்களை கேட்கச்சொன்ன
வாசுதேவனும் இல்லை
இந்த ஆற்றின் எண்ணற்ற ஓசைகளைக் கேட்கும்
சித்தார்த்தனும் இல்லை
ஆறு எங்கே செல்கிறது
பிடோக் பேராறு
அமைதியாய்
பேரமைதியாய்
மெல்ல அசைகிறது
நீரை யாரும் தொடுவதில்லை
கைகால்களை நனைப்பதில்லை
குளிப்பதில்லை
யாருக்கும் அன்போ வெறுப்போ
எதுவுமே
இந்த ஆற்றின் மீது இல்லை
கொட்டும் மழையில்
மறுபடியும் நிறைகிறது
மறுபடியும் தவிக்கிறது
இருபுறமும் ஆயிரமாயிரம் கண்கள்
வேடிக்கைப் பார்த்தபடி கடக்கின்றன
காற்றை உள்வாங்கியபடி
கரையில் தனிமையில்
இளைப்பாறுகிறது மணல்
ஒரு சின்னஞ்சிறு பறவையின் சலனத்தில்
மெல்ல ஆடியாடி நகர்கிறது
பிடோக் பேராறு
- இன்பா
