என் புத்தக அலமாரியிலிருந்து
நூல்களைக் கடன் வாங்கிச் சென்றான்
நண்பன்
அவனைப் பார்க்க
எதேச்சையாகத்தான் சென்றேன்
அவனது உள்கூடஅறை மினுக்கியிருந்தது
கைப்பிடித்துப் பார்க்கிறேன் நூல்களை
நேருவின் கடிதங்களில்
நசுங்கிக்கிடந்தன கால்கள்
தட்டிவிட்டதும் விழுந்தது
தலையறுந்த பூச்சி
அன்னாவின் முகம் நசுங்கியதற்காக
விரான்ஸ்கி முறைத்துக்கொண்டிருந்தான்
பழுத்துப்போன காந்தியின்
பக்கங்களுக்கு வந்தது சோதனை
போர்கெஸ் வெளியில் கிடக்க
தாகூரும் கிப்ரானும் புலம்பினர்
நகுலனும் பிரமிளும் அபியும்
நல்லவேளை தப்பித்தனர்
நீண்ட கொடுக்குகளின்
சிறகுகளை விரிக்க முடியாமல்
மல்லாக்கக் கிடந்தது கரையான்
என்னைக் கண்டதும்
கைகால்களை உதறி
எழுந்து வந்து
குரல்வளையைப் பிடித்தது
அவனது கதையை
எறும்புகள் உருட்டிச்செல்ல
கையில் விரித்திருந்த கவிதை நூலில்
ஊர்ந்து செல்கின்றன கபாலமற்ற கரையான்கள்
- இன்பா
