மார்க்வெஸ் அழகியை ஏன்
தூங்க வைத்தாரென
உங்களைப் போல் எனக்கும் ஆச்சரியம்தான்
அழகிகளின் அழகிய கண்கள்
பதித்து வைத்த கறுப்பு வைரங்கள்
தூங்கும் கண்கள்
அப்போதுதான் தூங்கி விழித்த கண்கள்
காமம் ததும்பும் கண்கள்
தூங்கச் செல்கையில்
அழகி நினைவுக்கு வருகிறாள்
அவளது விழிகள் வந்து போகின்றன
விமானத்தின் பக்கத்து இருக்கையில் அமர்ந்து
மார்க்வெஸ் எப்படி ரசித்திருப்பாரென
நானும் பார்க்கிறேன்
லோரியலின் வளைந்த
முள்ளெலி தூரிகையால்
மஸ்காரா போடுகையில்
இதழ்கள் குவிகின்றன
விழிகளில் சித்திரம் வரைய
பேழையில் மிதக்கும் பாவையில்
தேவதை வந்து நிற்கிறாள்
கவிதைகளைப் போல்
கண்களும் தூங்குகின்றன
- இன்பா
